كي ثورتنا كي كورتنا...

كي ثورتنا كي كورتنا...

بلاد ماكلة بعضها من داخل بالإضرابات، وأحزاب تكسر في بعضها والدينار طايح واليورو شعلت فيه النار.. وعركنا واصل لراس النهج، تجي تسمع البرا شنو يقولوا علينا، تلقاهم يتحدثوا على التجربة الناجحة والثورة الرائدة والشعب المثقف الذي انقذ بلاده من مصير البلدان العربية الاخرى، حاولت الثورات المضادة من برا حاولت كررت محاولاتها، شيء ما حركت لينا حتى شعرة، الجراح والكسور لكلها منا فينا.

هكاكا الكورة، غانا وما ادراك ما غانا، 90 دقيقة وهي تهاجم وتقنبل ومسيبا علينا نجومها في أوروبا، من اتليتكو مدريد لميتز مرورا بانتر ميلان، شيء ما قدتش، تقول تضرب في النحاس، شوطين،90 دقيقة بالتمام والكمال ونحن واقفين حجر قدام رامي الغاني، دخل رامي التونسي ما شديناش في يديه دقيقة وحدة، فيسع فيسع بخفة ورشاقة حط الكورة في الشباك، جاب لغانا التعادل! ما يزيش زاد الحارس كيكس وقال ما نخرجش، مدافعين تمركي ضد مرماها، حراس متمردة، جمعية ماهيش رابحة حتى مقابلة، اداء في المجموعات تحت الصفر، وبعد تحل موقع الفيفا تلقاه كاتب: غانا انسحبت وتونس في الربع النهائي، ما تفهمش انتّ! لَصُبت تضحك على جنون الكرة لصُبت تحشم من غانا...يجيك الاخ جيمس كوسي مدرب غانا في حالة، يقلك يا سي محمد بالله يجي منو هذا، كيفاش عاملين 4 كؤوس افريقية و 5 نهائي افريقي، وربع نهائي كأس عالم، وزوز كؤوس عالم "17سنة"وضاربين كينيا بــ 13 مقابل صفر.. وبعد تترشحوا رغم بالتعادلات ونروحوا نحن رغم التيتروات ؟ فهمني يا سيى محمد راني باش نهبل، تقلو انت : يا كوسي خويا والله انا بيدي لاني فاهم حاجة.. تولي تأخذ بخاطرو، تعبي ليه الزيت زيتونة وتعطيع ما كتب ربي تمر وتشوف ليه بركوس والا اثنين "كان لقيت صار" وتشيعو للمطار، وبعد تتعدى للقهوة تسال على مدغشقر!!! 

نصرالدين السويلمي


شنوة رأيك ؟

like
0
dislike
0
love
1
funny
1
angry
0
sad
1
wow
0